اسحاق ڈار کا بحرینی وزیر خارجہ سے رابطہ، خطے کی صورتحال پر تبادلہ خیال

نائب وزیرِاعظم و وزیرِ خارجہ اسحاق ڈار نے بحرین کے وزیرِ خارجہ عبداللطیف بن راشد الزیانی سے اہم ٹیلیفونک رابطہ کیا، جس میں خطے کی تیزی سے بدلتی صورتحال پر تفصیلی اور سنجیدہ تبادلۂ خیال کیا گیا۔
گفتگو کے دوران دونوں رہنماؤں نے خطے میں بڑھتی کشیدگی پر گہری تشویش کا اظہار کرتے ہوئے اس بات پر زور دیا کہ موجودہ حالات میں فوری اور مؤثر سفارتی اقدامات ناگزیر ہیں۔ اس موقع پر اقوام متحدہ کی سلامتی کونسل میں جاری پیش رفت اور عالمی سطح پر جاری سفارتی کوششوں کا بھی جائزہ لیا گیا۔
دونوں وزرائے خارجہ نے اس امر پر اتفاق کیا کہ خطے میں امن و استحکام کا قیام اولین ترجیح ہونا چاہیے، اور کسی بھی ممکنہ تصادم کو روکنے کے لیے مشترکہ حکمت عملی اور قریبی رابطہ ناگزیر ہے۔
گفتگو کے اختتام پر دونوں رہنماؤں نے باہمی روابط مزید مضبوط بنانے، مسلسل مشاورت جاری رکھنے اور خطے میں امن کے قیام کے لیے مشترکہ کوششیں تیز کرنے کے عزم کا اعادہ کیا۔