عالمی سطح پر متبادل سرمایہ کاری کے شعبے میں نمایاں مقام رکھنے والی کمپنی آرکیپیٹا گروپ ہولڈنگز لمیٹڈ نے امریکہ کی ایک معروف پارکنگ لاٹ مرمت فراہم کرنے والی کمپنی سی اینڈ کے پےونگ میں بڑی حصص داری خرید لی ہے۔
اس شراکت داری کے باوجود کمپنی کے بانی اور صدر ڈان کوچ اپنی اقلیتی ملکیت برقرار رکھیں گے اور آئندہ بھی ادارے کی قیادت کرتے رہیں گے۔
امریکہ میں پارکنگ لاٹ مرمت کی صنعت کی سالانہ مالیت تقریباً 14 ارب ڈالر ہے۔ یہ صنعت اس لیے مستحکم سمجھی جاتی ہے کہ اس کی طلب بار بار پیدا ہوتی ہے، اسے قانونی تقاضے سہارا دیتے ہیں اور معاشی اتار چڑھاؤ سے زیادہ متاثر نہیں ہوتی۔ چونکہ یہ شعبہ ابھی تک چھوٹے چھوٹے حصوں میں بٹا ہوا ہے، اس لیے بڑی کمپنیوں کے پاس ملک بھر میں اپنے نیٹ ورک کو بڑھانے اور خدمات کو معیاری شکل دینے کے وسیع مواقع موجود ہیں۔ اسی ماحول میں سی اینڈ کے پےونگ اپنی جگہ پہلے ہی مضبوط کر چکی ہے۔
یہ ادارہ اسفالٹ اور کنکریٹ کی مرمت، پارکنگ ایریاز میں لائن مارکنگ، سیل کوٹنگ اور دیگر احتیاطی سروسز فراہم کرتا ہے جو پارکنگ لاٹس کی دیکھ بھال کے لیے ضروری سمجھی جاتی ہیں۔ اس کے گاہکوں میں بڑے اسٹورز، پراپرٹی مینجمنٹ کمپنیاں، گروسری چینز اور مالیاتی ادارے شامل ہیں۔ صرف بڑے دس گاہکوں کے ساتھ اوسط تعلق آٹھ سال پر محیط ہے، جو ادارے پر اعتماد کی واضح علامت ہے۔
یہ سرمایہ کاری آرکیپیٹا کے لیے گزشتہ بارہ مہینوں میں کاروباری خدمات کے شعبے میں تیسری بڑی ڈیل ہے۔ ان تینوں سودوں کی مجموعی مالیت سات سو پندرہ ملین ڈالر بنتی ہے۔
اس کے ذریعے آرکیپیٹا اپنی "ایسینشل بزنس سروسز” پورٹ فولیو کو بڑھا رہی ہے جس کا مقصد ایسے کاروباروں میں سرمایہ کاری کرنا ہے جو مستقل آمدنی پیدا کریں اور جن کی خدمات کی مانگ وقت کے ساتھ برقرار رہے۔
اس نئے معاہدے کے موقع پر دونوں کمپنیوں کے اعلیٰ عہدیداروں نے اپنے خیالات کا اظہار کیا۔ آرکیپیٹا کے سی ای او ہشام الرعَی نے کہا کہ سی اینڈ کے جیسی کمپنیاں ہماری سرمایہ کاری حکمتِ عملی کا مرکز ہیں کیونکہ ان کا بزنس ماڈل پائیدار ہے، صارفین متنوع ہیں اور ان کے پاس قومی سطح پر پھیلنے کی صلاحیت موجود ہے۔
اسی طرح آرکیپیٹا کے یو ایس پرائیویٹ ایکویٹی کے منیجنگ ڈائریکٹر نیل کارٹر نے کمپنی کی سالہا سال کی مستقل ترقی کو سراہتے ہوئے کہا کہ سی اینڈ کے کا "ایسٹ لائٹ” ماڈل اور خدمات کا معیار اس کو ہمارے پورٹ فولیو کے لیے ایک بہترین اضافہ بناتا ہے۔
ادھر سی اینڈ کے پےونگ کے بانی اور سربراہ ڈان کوچ نے اس شراکت داری کو اپنی کمپنی کے لیے ایک نیا باب قرار دیا۔ ان کا کہنا تھا کہ گزشتہ بیس برسوں میں ہم نے اعتماد، معیار اور دیرپا تعلقات پر مبنی ایک پلیٹ فارم کھڑا کیا ہے۔
اب آرکیپیٹا کی معاونت سے ہم نہ صرف قومی سطح پر مزید وسعت حاصل کریں گے بلکہ حکمتِ عملی پر مبنی نئی خریداریوں (acquisitions) اور اپنی خدمات کو مزید بہتر بنانے پر بھی توجہ دیں گے تاکہ صارفین کو زیادہ فائدہ پہنچایا جا سکے۔