کویت سٹی: کویت کی کابینہ نے یومِ آزادی کی مناسبت سے ملک بھر میں سرکاری تعطیلات کا اعلان کر دیا ہے۔ غیر ملکی خبر رساں ایجنسی کے مطابق یہ فیصلہ کابینہ کے ہفتہ وار اجلاس میں کیا گیا، جس کے بعد جاری کردہ سرکاری بیان میں بتایا گیا کہ بدھ 25 فروری اور جمعرات 26 فروری کو عام تعطیل ہوگی۔
اعلامیے کے مطابق ان دو روز کے دوران تمام سرکاری وزارتوں، سرکاری محکموں، عوامی اداروں اور سرکاری دفاتر میں کام مکمل طور پر معطل رہے گا۔ حکام کا کہنا ہے کہ تعطیلات کا مقصد شہریوں کو قومی دن کی تقریبات میں بھرپور شرکت کا موقع فراہم کرنا اور قومی یکجہتی کو فروغ دینا ہے۔
کویت میں جمعہ اور ہفتہ پہلے ہی ہفتہ وار تعطیلات کے دن ہوتے ہیں، اس طرح 25 اور 26 فروری کی سرکاری چھٹیوں کو شامل کرنے سے سرکاری ملازمین اور بیشتر نجی شعبے کے کارکنوں کو چار روزہ طویل تعطیلات میسر آئیں گی۔ اس فیصلے کے بعد ملک میں تفریحی مقامات، شاپنگ مالز اور سیاحتی سرگرمیوں میں اضافے کا امکان ظاہر کیا جا رہا ہے۔
سرکاری بیان میں واضح کیا گیا ہے کہ باقاعدہ دفتری امور کا آغاز اتوار یکم مارچ سے ہوگا، جب تمام سرکاری ادارے معمول کے مطابق کھل جائیں گے۔
تاہم وہ ادارے جو خصوصی نوعیت کی آپریشنل ذمہ داریاں انجام دیتے ہیں، جیسے سیکیورٹی ادارے، اسپتال اور صحت کے مراکز، ایمرجنسی سروسز اور دیگر اہم عوامی خدمات فراہم کرنے والے محکمے، تعطیلات کے دوران بھی اپنی خدمات جاری رکھیں گے۔ حکام کے مطابق ان اداروں کو ہدایت دی گئی ہے کہ وہ عوامی مفادات کو مدنظر رکھتے ہوئے اپنی تعطیلات کا شیڈول ترتیب دیں تاکہ ضروری خدمات کی فراہمی میں کسی قسم کا خلل نہ آئے۔
یاد رہے کہ کویت ہر سال 25 فروری کو یومِ آزادی قومی جوش و جذبے کے ساتھ مناتا ہے، جس کے موقع پر سرکاری سطح پر تقاریب، آتش بازی کے مظاہرے اور مختلف ثقافتی سرگرمیوں کا انعقاد کیا جاتا ہے۔