پاکستان بھر میں رمضان المبارک 1447 ہجری کا چاند نظر آنے کا باضابطہ اعلان کردیا گیا ہے، جس کے بعد ملک بھر میں کل بروز 19 فروری پہلا روزہ رکھا جائے گا۔
مرکزی اجلاس مرکزی رویت ہلال کمیٹی کا انعقاد پشاور میں ہوا، جس کی صدارت چیئرمین مولانا عبدالخبیر آزاد نے کی۔ اجلاس میں ملک کے مختلف حصوں سے موصول ہونے والی شہادتوں کا تفصیلی جائزہ لیا گیا۔
اجلاس کے دوران بتایا گیا کہ خیبرپختونخوا کے مختلف علاقوں خصوصاً پشاور، مردان، صوابی، چارسدہ، نوشہرہ اور اسلام آباد سے چاند دیکھنے کی مجموعی طور پر 21 مستند شہادتیں موصول ہوئیں۔ اس کے علاوہ زونل کمیٹیوں کو بھی 6 علیحدہ شہادتیں موصول ہوئیں، جنہیں جانچنے کے بعد مرکزی کمیٹی کو ارسال کیا گیا۔
زونل اجلاس کراچی، کوئٹہ، راولپنڈی اور لاہور سمیت دیگر شہروں میں بھی منعقد ہوئے، جہاں علماء کرام اور ماہرین نے شہادتوں کی جانچ پڑتال کی۔
اجلاس کے بعد میڈیا سے گفتگو کرتے ہوئے مولانا عبدالخبیر آزاد نے اعلان کیا کہ ملک کے طول و عرض سے رمضان المبارک کے چاند کی متعدد معتبر شہادتیں موصول ہوئیں، جن کی روشنی میں متفقہ فیصلہ کیا گیا کہ 19 فروری کو یکم رمضان المبارک 1447 ہجری ہوگی۔
انہوں نے قوم کو رمضان المبارک کی مبارکباد دیتے ہوئے کہا کہ یہ مہینہ صبر، تقویٰ، اخوت اور ہمدردی کا پیغام دیتا ہے۔ انہوں نے عوام سے اپیل کی کہ وہ اس مقدس مہینے میں عبادات، خیرات اور بھائی چارے کو فروغ دیں اور ملک کی سلامتی و خوشحالی کے لیے خصوصی دعائیں کریں۔
یوں پورے ملک میں مساجد میں سحری و افطار کے انتظامات کو حتمی شکل دے دی گئی ہے اور مسلمانانِ پاکستان روحانی جوش و خروش کے ساتھ رمضان المبارک کا استقبال کرنے کے لیے تیار ہیں۔