وفاقی دارالحکومت اسلام آباد میں دنیا کی سیر پر سائیکل کے ذریعے نکلنے والا ایک جرمن شہری واردات کا شکار ہو گیا، تاہم پولیس کی کارروائی کے بعد اس کی سائیکل برآمد کر لی گئی۔
ذرائع کے مطابق جرمنی سے تعلق رکھنے والے سیاح فلپ سام نے رات گزارنے کے لیے اسلام آباد ایکسپریس وے کے قریب تھانہ کھنہ کے علاقے میں کیمپ لگا رکھا تھا۔ تاہم صبح بیدار ہونے پر اسے معلوم ہوا کہ اس کی سائیکل اور قیمتی کیمرہ چوری ہو چکے ہیں۔
واقعے کے بعد جرمن سفارتخانے کی مداخلت پر اسلام آباد پولیس فوری طور پر متحرک ہو گئی اور ملزمان کی تلاش کے لیے کارروائیاں شروع کی گئیں۔ پولیس نے تیزی سے کارروائی کرتے ہوئے سیاح کی سائیکل برآمد کر لی، تاہم کیمرہ تاحال بازیاب نہیں ہو سکا۔
یہ واقعہ نہ صرف سیکیورٹی کے حوالے سے سوالات اٹھا رہا ہے بلکہ غیر ملکی سیاحوں کے تحفظ کے معاملے کو بھی اجاگر کر رہا ہے۔ حکام کا کہنا ہے کہ واقعے میں ملوث عناصر کی گرفتاری کے لیے چھاپے مارے جا رہے ہیں اور جلد مزید پیش رفت متوقع ہے۔
سیاحتی ماہرین کے مطابق ایسے واقعات پاکستان کے مثبت امیج پر اثر انداز ہو سکتے ہیں، اس لیے ضروری ہے کہ غیر ملکی سیاحوں کے تحفظ کو یقینی بنانے کے لیے مؤثر اقدامات کیے جائیں۔
Add A Comment