سعودی عرب کے فیشن کمیشن نے جاپان کے شہر اوساکا میں جاری ایکسپو 2025 میں اپنی شاندار شرکت کے ذریعے عالمی سطح پر سعودی ثقافت اور فیشن کی اہمیت کو اجاگر کیا ہے۔ کمیشن نے اس نمائش میں تخلیقی اظہار، ثقافتی میراث اور جدید ڈیزائن کو کامیابی کے ساتھ یکجا کیا، اور عالمی سطح پر اپنے منفرد وژن کا تعارف کرایا۔
سعودی پریس ایجنسی کی رپورٹ کے مطابق، اوساکا میں سعودی پویلین میں کمیشن نے ثقافتی شناخت کے تحفظ اور نئے سعودی ڈیزائنرز کے حوالے سے ایک پینل بحث کا انعقاد کیا۔ اس بحث کا مقصد یہ تھا کہ کس طرح سعودی کلچر تخلیقی اظہار کی بنیاد بن سکتا ہے اور سعودی ڈیزائنرز روایت اور جدت کے درمیان توازن قائم کرتے ہوئے عالمی سطح پر اپنا منفرد تاثر چھوڑ سکتے ہیں۔
کمیشن کے سی ای او بوراک چکمک نے اس موقع پر کہا، سعودی تخلیقی عمل کو سامنے لانے سے بامعنی تبادلے کی فضا بنتی ہے۔ ہمارے ڈیزائنر دنیا بھر میں وہ کہانیاں شیئر کرتے ہیں جو ہماری میراث میں جڑی ہیں۔‘‘ انہوں نے مزید کہا کہ ’’اس مکالمے کے دوران، صارفین جدت، مستند بننے اور ثقافتی اعتبار سے متعلق ہونے کی تلاش میں ہوتے ہیں، جس سے روایت اور مستقبل ایک دوسرے سے جڑتے ہیں۔‘‘
سعودی پویلین میں سعودی فیشن کمیشن کی ایک اور اہم پیشکش ثقافتی تبادلے کی تھی، جس میں کمیشن کے دو مخصوص انیشیٹیوز کو نمائش میں شامل کیا گیا۔ ایک مقابلہ سعودی ثقافت کی بحالی تھا، جس میں 26 سعودی ڈیزائنرز کو چیلنج دیا گیا کہ وہ کمپنی کے کرسٹل استعمال کرتے ہوئے پائیدار فیشن کے ذریعے سعودی ثقافت کی تشریح کریں۔
اس مقابلے کا مقصد سعودی ثقافت کی روشنی میں عالمی فیشن کی نئی سمتوں کا تعین کرنا تھا۔ اس مقابلے میں جیتنے والے ڈیزائنر کو سعودی عرب کے مشہور ڈیزائن ہاؤس ’’دارلھنوف‘‘ میں رہائش کا انعام دیا گیا، جبکہ پہلے پانچ پوزیشن حاصل کرنے والے ڈیزائنرز کو بین الاقوامی سطح پر علمی مقابلوں میں شرکت کا موقع دیا گیا۔
ایک اور پروگرام ’’سعودی فیشن میں روایتی دستکاری کا احیا‘‘ میں 25 شرکا نے حصہ لیا، جو سعودی فنِ تعمیر، ہنر اور ملبوسات کی ورکشاپ میں شامل ہوئے۔ یہ ورکشاپ سعودی عرب کی روایتی دستکاریوں کو جدید فیشن کے ساتھ ہم آہنگ کرنے کی کوشش کرتی ہے۔ اس پروگرام کے ذریعے سعودی عرب کے مقامی ہنر مندوں کو عالمی سطح پر اپنی مہارت دکھانے کا موقع مل رہا ہے، اور ساتھ ہی سعودی فیشن کی دنیا میں نئے امکانات کا دروازہ کھل رہا ہے۔
کمیشن کی یہ تمام کوششیں تعلیمی ترقی اور مقامی سطح پر ہنر مند افراد کی تربیت کے حصے کے طور پر کی جا رہی ہیں۔ ان اقدامات کا مقصد سعودی عرب میں فیشن کی صنعت کو مستحکم کرنا، روایتی ہنر کو محفوظ کرنا اور سعودی ڈیزائنرز کے لیے پائیدار کیریئر کے مواقع پیدا کرنا ہے۔
اوساکا ایکسپو 2025 میں سعودی فیشن کمیشن کی موجودگی ویژن 2030 کے مقصد کا عکاس ہے، جس کا مقصد سعودی عرب کی تخلیقی صنعتوں کو عالمی سطح پر ایک نیا مقام دلانا ہے۔ کمیشن کا ویژن ہے کہ سعودی فیشن ایک ایسا ماحولی نظام بنے جو نہ صرف سعودی عرب کی ثقافتی وراثت کو محفوظ کرے بلکہ عالمی سطح پر بھی اس کا تاثر قائم کرے اور پائیداری کی طرف گامزن ہو۔