نیویارک :اقوام متحدہ کی سلامتی کونسل کے اعلیٰ سطحی سیاسی فورم کے موقع پر ایک اہم سفارتی پیش رفت دیکھنے میں آئی جب سعودی عرب کے وزیر برائے معیشت و منصوبہ بندی فیصل بن فاضل الابراہیم اور پاکستان کے نائب وزیراعظم و وزیر خارجہ اسحاق ڈار کے درمیان ملاقات ہوئی۔یہ ملاقات نہ صرف دو برادر اسلامی ممالک کے دیرینہ تعلقات کی عکاس تھی بلکہ اقتصادی و تکنیکی تعاون کے ایک نئے دور کی بنیاد بھی بنی۔
ملاقات میں دونوں رہنماؤں نے دوطرفہ اقتصادی تعلقات کو نئی جہت دینے، عوامی پالیسیوں کو مربوط کرنے اور پائیدار ترقی کے اہداف کے حصول کے لیے مشترکہ کوششیں تیز کرنے پر زور دیا۔ انہوں نے اس بات پر اتفاق کیا کہ باہمی اشتراک سے دونوں اقوام اقتصادی ترقی، علاقائی ہم آہنگی اور دیرپا خوشحالی کی راہ پر گامزن ہو سکتی ہیں۔
دونوں وزراء نےتحفظ خوراک، مینوفیکچرنگ، کان کنی اور معدنیات جیسے کلیدی شعبوں میں تعاون کو بڑھانے پر خصوصی گفتگو کی۔ ان شعبوں میں مشترکہ منصوبوں، سرمایہ کاری اور ٹیکنالوجی کے تبادلے کے امکانات کا جائزہ لیا گیا۔
دونوں فریقین نے باہمی مفاد پر مبنی منصوبوں میں سرمایہ کاری کے فروغ اور تکنیکی تعاون کو مزید وسعت دینے پر بھی اتفاق کیا۔ اس بات پر زور دیا گیا کہ سرکاری و نجی شعبوں کے درمیان اشتراک سے نئی راہیں کھل سکتی ہیں، جو دونوں ممالک کی معیشتوں کو فائدہ پہنچائیں گی۔
ملاقات کے دوران ایک مشترکہ وژن پر بھی بات ہوئی جس کا مقصد نہ صرف دونوں ممالک کی ترقی ہے بلکہ پورے خطے میں امن، استحکام اور خوشحالی کو یقینی بنانا ہے۔ اسٹریٹیجک شراکت داری کے اس نئے دور میں دونوں ممالک کی قیادت نے قریبی تعاون کو وقت کی ضرورت قرار دیا۔