ریاض : سعودی وزیر اسلامی امور شیخ عبداللطیف آل شیخ نے ریاض میں سری لنکا کے سفیر عمر لبی اجواد اور ان کے وفد کا گرما گرم استقبال کیا۔ سعودی پریس ایجنسی (ایس پی اے) کے مطابق ملاقات کے دوران اسلامی امور اور دونوں ممالک کے درمیان جاری تعاون سمیت مختلف اہم موضوعات پر تبادلہ خیال کیا گیا۔
سری لنکا کے سفیر عمر لبی اجواد نے میڈیا سے گفتگو کرتے ہوئے سعودی عرب کے عالمی سطح پر اسلامی کاز کی حمایت اور خصوصاً سری لنکا میں رواداری اور اعتدال پسندی کو فروغ دینے میں مملکت کے قائدانہ کردار کی تعریف کی۔ انہوں نے کہا، "مملکت کی یہ کوششیں اسلام کے حقیقی پیغام کی عکاسی کرتی ہیں اور دنیا بھر میں مثبت اثرات مرتب کر رہی ہیں۔”
سفیر نے مزید کہا کہ "ہم رواداری اور اعتدال پسندی کی اقدار کو فروغ دینے میں مملکت کے مثالی کردار پر فخر کرتے ہیں ایک عظیم مشن جو حقیقی معنوں میں اسلام کے پیغام کی نمائندگی کرتا ہے۔” انہوں نے مختلف شعبوں میں سری لنکا کو فراہم کی جانے والی معاونت خصوصاً قرآنی تعلیمات کی روشنی میں پیش کی جانے والی خدمات کو بھی سراہا۔
عمر لبی اجواد نے وزارت اسلامی امور کی طرف سے دنیا بھر میں اعتدال پسندی کا پیغام پھیلانے کے اقدامات کو بھی سراہا۔ انہوں نے وزارت کے آگاہی پروگراموں، آئمہ اور مبلغین کی تربیت، اور قرآنی مقابلوں کے انعقاد میں اہم کردار کو قابل تعریف قرار دیا۔
یہ ملاقات دونوں ممالک کے درمیان اسلامی امور میں تعاون کو مزید مستحکم کرنے اور عالمی سطح پر اعتدال پسندی و رواداری کے فروغ کے عزم کو ظاہر کرتی ہے۔