سعودی عرب بھر میں 23 ستمبر 2025 کو 95واں یومِ وطنی شایانِ شان انداز میں منانے کی تیاریاں زور و شور سے جاری ہیں۔ سعودی خبر رساں ادارے ایس پی اے کے مطابق مکہ مکرمہ قومی جوش و خروش کا مرکز بن چکا ہے، جہاں سڑکیں، چوراہے، انڈر پاسز اور بلدیاتی عمارتیں سبز روشنیوں اور پرچموں سے جگمگا رہی ہیں۔
مکہ مکرمہ میونسپلٹی نے خصوصی اقدامات کرتے ہوئے شہر کے مختلف مقامات پر 1600 سے زائد قومی پرچم نصب کر دیے ہیں جبکہ عمارتوں کو سبز روشنیوں سے منور کر کے قومی دن کے رنگ کو مزید جاذبِ نظر بنایا جا رہا ہے۔ شہر بھر کی الیکٹرانک سکرینوں پر یوم وطنی کے حوالے سے خصوصی ڈیزائنز، قومی پیغامات اور رعایتی پیکجز کی تشہیر بھی جاری ہے تاکہ شہریوں اور زائرین کو قومی دن کا جوش و خروش ہر جگہ محسوس ہو۔
میونسپلٹی نے اعلان کیا ہے کہ مکہ مکرمہ کے پارک، تفریحی مقامات اور جشن کے مراکز مکمل طور پر تیار کر لیے گئے ہیں۔ ان مقامات پر مختلف تقریبات، ثقافتی سرگرمیوں اور تفریحی پروگراموں کا انعقاد کیا جائے گا، جہاں نہ صرف سعودی شہری بلکہ مقیم غیر ملکی بھی شریک ہو سکیں گے۔
یہ خصوصی تقاریب سعودی عرب کی روایتی ثقافت، قومی یکجہتی اور جدید ترقی کی عکاسی کریں گی۔ روشنیوں سے جگمگاتی عمارتیں، موسیقی و آرٹ کے پروگرام، اور خاندانوں کے لیے خوشگوار ماحول اس دن کو مزید یادگار بنائیں گے۔
95واں یومِ وطنی اس بات کی علامت ہے کہ سعودی عرب نے گزشتہ برسوں میں ترقی، خوشحالی اور یکجہتی کی نئی مثالیں قائم کی ہیں۔ مکہ مکرمہ میں جاری یہ تیاریاں اس قومی دن کو نہ صرف سعودی عوام بلکہ دنیا بھر کے مسلمانوں کے لیے ایک یادگار لمحہ بنا رہی ہیں۔