کراچی: پاکستان میں سونے کی قیمتوں میں غیر معمولی کمی کا سلسلہ جاری ہے اور مسلسل دو روز کے دوران فی تولہ سونا 12 ہزار 400 روپے تک سستا ہو گیا ہے، جو حالیہ معاشی صورتحال میں ایک بڑی پیشرفت قرار دی جا رہی ہے۔
آج سونے کی فی تولہ قیمت میں 9 ہزار 100 روپے کی غیر معمولی کمی ریکارڈ کی گئی، جسے ملکی تاریخ کی تیسری بڑی کمی کہا جا رہا ہے۔ اس سے قبل گزشتہ روز بھی 3 ہزار 300 روپے کی گراوٹ نوٹ کی گئی تھی۔
مسلسل دو روز کی کمی کے بعد فی تولہ سونا 4 لاکھ 30 ہزار 662 روپے پر آگیا ہے، جو سرمایہ کاروں اور زیورات کے کاروبار سے وابستہ حلقوں کے لیے حیران کن صورتحال ہے۔
عالمی مارکیٹ میں بھی دباؤ برقرار ہے، جہاں سونے کی قیمت 91 ڈالر کم ہو کر 4 ہزار 83 ڈالر فی اونس ہوگئی ہے۔ بین الاقوامی سطح پر یہ کمی ملکی مارکیٹ پر بھی واضح اثر ڈال رہی ہے۔
چاندی کی قیمتوں میں بھی کمی کا رجحان دیکھا گیا ہے اور فی تولہ چاندی 209 روپے کمی کے بعد 5 ہزار 313 روپے کی سطح پر آ گئی ہے۔
حیران کن طور پر، فی تولہ سونے کی بڑی کمی کے برعکس 10 گرام سونے کی قیمت میں 7 ہزار 799 روپے اضافہ ریکارڈ کیا گیا ہے، جس کے بعد نئے نرخ 3 لاکھ 69 ہزار 223 روپے ہو گئے ہیں۔
یہ تضاد مارکیٹ میں قیمتوں کے تعین کے میکانزم، طلب و رسد اور مختلف گرام ویٹ کی حسابی تبدیلیوں پر نئی بحث چھیڑ رہا ہے۔
ماہرین کے مطابق عالمی منڈی میں غیر یقینی صورتحال، ڈالر کی شرح میں اتار چڑھاؤ اور مقامی مارکیٹ کی تکنیکی ایڈجسٹمنٹ اس غیر معمولی تضاد کی وجوہات ہوسکتے ہیں۔