نتھیاگلی :پاکستان کے خوبصورت اور سرسبز سیاحتی مقام نتھیاگلی میں عالمی شہرت یافتہ ہوٹل برانڈ ہلٹن نے اپنے پہلے ہوٹل "ڈبل ٹری بائی ہلٹن” کا باضابطہ افتتاح کر دیا ہے، جو نہ صرف پاکستان میں سیاحت کے فروغ کی علامت ہے بلکہ ملک کی معیشت اور عالمی برانڈز کے اعتماد کا بھی اظہار ہے۔
یہ پرتعیش ہوٹل اسلام آباد سے صرف 85 کلومیٹر کے فاصلے پر واقع ہے اور اسے دی بیرن پاکستان (پرائیویٹ) لمیٹڈ کی ملکیت و انتظام میں چلایا جا رہا ہے۔ ہوٹل کی منفرد لوکیشن اور عالمی معیار کی سہولیات اسے پاکستان میں سیاحتی سرمایہ کاری کے ایک سنگ میل کے طور پر سامنے لا رہی ہیں۔
ڈبل ٹری بائی ہلٹن نتھیاگلی، لالازار پارک کے نزدیک واقع ہے اور اسے ایوبیہ نیشنل پارک، مشکپوری ٹاپ، میرنجانی پیک، ڈونگا گلی پائپ لائن ٹریک اور تاریخی سینٹ میتھیو چرچ جیسی مشہور جگہوں تک آسان رسائی حاصل ہے۔ تمام اہم سیاحتی مقامات ہوٹل کے پانچ کلومیٹر کے دائرے میں واقع ہیں، جو ایڈونچر اور ثقافتی سیاحت کے شوقین افراد کے لیے ایک مثالی مرکز بناتا ہے۔
ہوٹل میں 110 خوبصورت ڈیزائن کردہ کمرے اور 14 پرتعیش سوئٹس موجود ہیں، جن کی کھڑکیوں سے مشکپوری اور میرنجانی پہاڑیوں کے دلکش مناظر دکھائی دیتے ہیں۔ مہمانوں کو پہاڑی نظاروں کے ساتھ شاندار ڈائننگ آپشنز فراہم کیے جا رہے ہیں۔
دلچسپ بات یہ ہے کہ ہلٹن کا یہ ہوٹل پاکستان کا پہلا ماؤنٹین پیڈل کورٹ بھی متعارف کروا رہا ہے۔ جلد ہی یہاں ایک ایکسکلوزو لاؤنج کھولا جائے گا جس میں نجی سینیما، بچوں کا زون اور بیوٹی سیلون جیسی سہولیات شامل ہوں گی۔ مزید برآں، ہوٹل میں ایک آن سائٹ ہیلی پیڈ بھی دستیاب ہے جو مہمانوں کو پہاڑی راستوں کی دشواری سے بچاتے ہوئے آسان رسائی فراہم کرے گا۔
یہ منصوبہ پاکستان میں عالمی سطح کی مہمان نوازی کی نئی جہتوں کا آغاز ہے، جس سے نہ صرف سیاحت کو فروغ ملے گا بلکہ مقامی معیشت، روزگار اور بین الاقوامی اعتماد میں بھی اضافہ ہوگا۔