محبت میں انسان کچھ بھی کر بیٹھتا ہے، اور یہ کہانی بھی ایک عاشق کے جذبات کی عکاسی کرتی ہے، جس نے اپنی محبوبہ کے فون کال نہ اُٹھانے پر پورے گاؤں کی بجلی کاٹ ڈالی۔ بھارت میں پیش آنے والا یہ انوکھا واقعہ سوشل میڈیا پر وائرل ہوگیا، جس نے صارفین کو حیرانی اور تفریح کا سامنا کرایا۔
ویڈیو میں دیکھا جا سکتا ہے کہ ایک نوجوان بڑے پلایئرز (pliers) کے ساتھ بجلی کے کھمبے پر چڑھتا ہے اور چند لمحوں بعد تار کاٹ دیتا ہے، جس کے نتیجے میں اس کی محبوبہ کے گاؤں کی بجلی معطل ہو جاتی ہے۔ نوجوان کا یہ اقدام اس وقت سامنے آیا جب اس کی گرل فرینڈ مسلسل فون کالز کا جواب نہیں دے رہی تھی اور لائن بار بار مصروف جا رہی تھی۔
محبت کی یہ شدت اتنی تھی کہ نوجوان نے بات چیت کے ذریعے مسئلہ حل کرنے کے بجائے جذبات میں آ کر پورے گاؤں کی بجلی کاٹ ڈالی۔ ویڈیو تیزی سے سوشل میڈیا پر پھیل گئی اور دیکھتے ہی دیکھتے یہ میمز کا موضوع بن گئی۔
کچھ سوشل میڈیا صارفین نے مذاق کرتے ہوئے کہا کہ یہ نوجوان واقعی "فلمی عاشق” ہے، تو کچھ نے کہا کہ اس نے پاور کٹ کو نئی سطح پر پہنچا دیا ہے۔ ایک صارف نے تو یہ تک لکھا کہ "بھائی کو چاہیے بالی ووڈ فلمیں کم دیکھے!”
یہ واقعہ اس بات کی یاد دہانی ہے کہ محبت میں کبھی کبھار انسان اتنے جذباتی ہو جاتا ہے کہ وہ انتہاؤں تک پہنچ جاتا ہے، اور کبھی کبھی اس کا نتیجہ مذاق اور تفریح کا سبب بن جاتا ہے۔