ایوانِ صدر میں ایک غیر رسمی ملاقات کے دوران فیلڈ مارشل سید عاصم منیر نے صحافیوں سے گفتگو کرتے ہوئے پُراعتماد انداز میں کہا کہ “سب ٹھیک ہے، سب کچھ آپ کے سامنے ہے۔” انہوں نے مزید کہا کہ حالات تیزی سے بہتری کی جانب بڑھ رہے ہیں اور پاکستان اب ایک اونچی اڑان کی طرف گامزن ہے، جو آنے والے برسوں میں ملک کی ترقی اور استحکام کا واضح ثبوت ہوگا۔
اس سے قبل وزیراعظم شہباز شریف نے فیلڈ مارشل سید عاصم منیر کی بطور چیف آف آرمی اسٹاف اور ساتھ ہی ملک کے پہلے چیف آف ڈیفنس فورسز کے طور پر تعیناتی کی سمری منظور کرتے ہوئے ایوان صدر بھجوا دی تھی۔ یہ تاریخی فیصلہ فیلڈ مارشل عاصم منیر کو پاکستان کی عسکری قیادت میں ایک نئی اور اہم ذمہ داری کے ساتھ پیش کرتا ہے۔
فیلڈ مارشل عاصم منیر کا بطور چیف آف ڈیفنس فورسز تقرر پانچ سالہ مدت کے لیے ہوگا، جس کے بعد وہ ملک کی دفاعی اسٹرکچر کو ایک متحد اور مربوط سمت دینے میں مرکزی کردار ادا کریں گے۔
ادھر دفاعی قیادت کے تسلسل کو برقرار رکھنے کے لیے چیف آف ایئر اسٹاف، ائیر چیف مارشل ظہیر احمد بابر سدھو کی مدتِ ملازمت میں دو سال کی توسیع کی منظوری بھی دے دی گئی ہے۔ یہ توسیع ان کی موجودہ پانچ سالہ مدتِ خدمت کے مارچ 2026 میں اختتام پذیر ہونے کے بعد نافذ ہوگی، جس سے ملکی فضائی دفاع میں استحکام اور پیشہ ورانہ تسلسل برقرار رہے گا۔
ملک کی اعلیٰ عسکری قیادت میں یہ اہم فیصلے نہ صرف ادارہ جاتی مضبوطی کا مظہر ہیں بلکہ پاکستان کے مستقبل کے دفاعی و اسٹریٹیجک وژن کی بنیاد بھی رکھتے ہیں۔