لاہور کی کوٹ لکھپت جیل میں قید تحریک انصاف کے سینئر رہنماؤں نے رمضان المبارک کے تقدس کے پیشِ نظر ہر قسم کی احتجاجی سرگرمیاں مؤخر کرنے کی اپیل کر دی ہے۔ ذرائع کے مطابق شاہ محمود قریشی، یاسمین راشد، اعجاز چوہدری، عمر سرفراز چیمہ اور محمود الرشید کی جانب سے میڈیا کو ایک مشترکہ خط ارسال کیا گیا جس میں پارٹی کارکنان اور قیادت سے درخواست کی گئی ہے کہ رمضان کے دوران احتجاجی تحریک کو مؤخر رکھا جائے اور تنظیمی استحکام پر توجہ دی جائے۔
خط میں صدر آصف علی زرداری کی جانب سے بانی پی ٹی آئی عمران خان کے خلاف حالیہ بیان بازی کی مذمت کرتے ہوئے کہا گیا ہے کہ عمران خان باوقار انداز میں مشکل حالات کا سامنا کر رہے ہیں۔ اسیر رہنماؤں نے حکومت سے مطالبہ کیا کہ عمران خان کی صحت کو سیاسی معاملہ نہ بنایا جائے اور ان کی بہنوں اور ذاتی معالجین کو اعتماد میں لے کر شفاف انداز میں علاج معالجہ یقینی بنایا جائے۔
مشترکہ خط میں تحریک تحفظ آئین پاکستان سے بھی اپیل کی گئی ہے کہ وہ پارلیمان کے اندر مؤثر اور بھرپور سیاسی کردار ادا کرے۔ اس کے ساتھ ساتھ تحریک انصاف کی تنظیم کو ازسرِنو منظم کرنے، بلدیاتی انتخابات کی تیاری کے لیے نچلی سطح تک ڈھانچے کو فعال بنانے اور کارکنان کو متحرک رکھنے پر زور دیا گیا ہے۔
اسیر رہنماؤں نے خط میں ملک کو درپیش چیلنجز—بڑھتی دہشتگردی، مہنگائی، تعلیمی بحران اور کرپشن—کو ہر فورم پر اجاگر کرنے کی ہدایت بھی کی ہے۔ سیاسی مبصرین کے مطابق یہ اپیل ایک جانب رمضان کے تقدس کا احترام ظاہر کرتی ہے تو دوسری جانب پارٹی کی توجہ احتجاجی سیاست کے بجائے تنظیمی مضبوطی اور پارلیمانی حکمت عملی کی طرف مبذول کرانے کی کوشش بھی ہے۔