اسلام آباد ہائی کورٹ میں القادر ٹرسٹ اور 190 ملین پاؤنڈ کیس کی سماعت اچانک منسوخ ہونے پر بانی پی ٹی آئی عمران خان کی بہنوں نے عدالت کے باہر دھرنا دے دیا، جو بعد ازاں نئی تاریخ ملنے پر ختم کر دیا گیا۔
ذرائع کے مطابق آج ہونے والی سماعت بنچ کی عدم دستیابی کے باعث منسوخ کی گئی، جس کے نتیجے میں عدالت کی مکمل کاز لسٹ بھی ختم کر دی گئی۔ عدالتی حکام کا کہنا ہے کہ چیف جسٹس سردار محمد سرفراز ڈوگر نیشنل جوڈیشل پالیسی میکنگ کمیٹی کے اجلاس میں مصروف تھے، جس کے باعث وہ سنگل بنچ میں کیسز کی سماعت نہ کر سکے۔
سماعت کی منسوخی پر عمران خان کی بہن علیمہ خان نے سخت ردعمل دیتے ہوئے اعلان کیا کہ جب تک کیس کی نئی تاریخ مقرر نہیں کی جاتی، احتجاج جاری رکھا جائے گا۔ اس دوران مظاہرین نے عدالت کے باہر دھرنا دے کر فوری سماعت کی تاریخ مقرر کرنے کا مطالبہ کیا۔
دوسری جانب عدالت کے ڈویژن بنچ میں کیسز کی سماعت جاری رہی، جہاں 190 ملین پاؤنڈ کیس میں سزا معطلی کی درخواستوں پر غور کیا جا رہا ہے، جس میں بشریٰ بی بی بھی شریک ہیں۔
بعد ازاں اسلام آباد ہائیکورٹ نے کیس کی سماعت کل کے لیے مقرر کر دی، جس کے بعد مظاہرین نے اپنا دھرنا ختم کر دیا۔
تجزیہ کاروں کے مطابق اس پیش رفت نے ایک بار پھر سیاسی و قانونی ماحول کو گرم کر دیا ہے، جبکہ کیس کی آئندہ سماعت پر تمام نظریں مرکوز ہیں۔