اسرائیل اور لبنان میں براہِ راست مذاکرات پر اتفاق، امریکا کی ثالثی اہم موڑ

امریکی محکمہ خارجہ نے اعلان کیا ہے کہ واشنگٹن ڈی سی میں ہونے والی اہم سفارتی ملاقاتوں کے بعد اسرائیل اور لبنان کے درمیان براہِ راست مذاکرات شروع کرنے پر اتفاق ہو گیا ہے۔
واشنگٹن میں ہونے والی اس اہم ملاقات میں دونوں ممالک کے سفیروں کے ساتھ مارکو روبیو بھی شریک تھے۔ امریکی محکمہ خارجہ کے نائب ترجمان ٹامی پیگٹ نے اس ملاقات کو “تاریخی” قرار دیتے ہوئے کہا کہ یہ پیش رفت خطے میں امن کے لیے ایک اہم سنگِ میل ثابت ہو سکتی ہے۔
انہوں نے کہا کہ امریکا کو امید ہے کہ اس براہِ راست رابطے کے نتیجے میں واشنگٹن کی ثالثی میں ایک طویل المدتی اور پائیدار امن معاہدے کی راہ ہموار ہوگی۔
سفارتی ماہرین کے مطابق یہ پیش رفت ایسے وقت میں سامنے آئی ہے جب خطے میں کشیدگی عروج پر ہے، اور عالمی طاقتیں کسی بڑے تصادم کو روکنے کے لیے سرگرم ہیں۔ امریکا کی ثالثی میں ہونے والی یہ کوششیں مشرق وسطیٰ میں استحکام کی جانب ایک اہم قدم سمجھی جا رہی ہیں۔