سعودی عرب کی وزارتِ حج و عمرہ کے مطابق رواں برس رمضان المبارک کے دوران بیرونِ مملکت سے آنے والے عمرہ زائرین کی تعداد 1.68 ملین (16 لاکھ 80 ہزار) تک پہنچ گئی، جو اس بات کی عکاسی کرتا ہے کہ دنیا بھر سے مسلمان بڑی تعداد میں مقدس مقامات کی زیارت کے لیے مملکت کا رخ کر رہے ہیں۔
سعودی خبررساں ادارے ایس پی اے کے مطابق جاری کردہ اعداد و شمار میں بتایا گیا کہ مسجد نبوی میں واقع ریاض الجنہ کے لیے تقریباً 11 لاکھ زائرین نے پرمٹ حاصل کیے، جن کا تعلق دنیا کے 155 مختلف ممالک سے تھا، جو عالمی سطح پر اس مقدس مقام کی اہمیت کو ظاہر کرتا ہے۔
وزارت کے مطابق مکہ مکرمہ، جدہ اور مدینہ منورہ میں قائم 30 نسک کیئر سینٹرز کے ذریعے 11 مختلف زبانوں میں ایک لاکھ 53 ہزار سے زائد خدمات فراہم کی گئیں، تاکہ مختلف ممالک سے آنے والے زائرین کو رہنمائی اور سہولت میسر ہو سکے۔
اسی طرح زائرین کی رہنمائی اور دیکھ بھال کے لیے قائم 1966 مراکز سے ایک لاکھ 97 ہزار افراد نے استفادہ کیا، جہاں انہیں مختلف امور میں رہنمائی فراہم کی گئی۔ رمضان المبارک کے دوران فیلڈ مانیٹرنگ ٹیموں نے رہائشی سیکٹرز کے 21 ہزار 500 سے زائد دورے کیے، جن کا مقصد زائرین کو فراہم کی جانے والی سہولیات کے معیار کا جائزہ لینا اور بہتری کو یقینی بنانا تھا۔
اس سے قبل مکہ مکرمہ و مشاعر مقدسہ رائل کمیشن کے مطابق رمضان کے ابتدائی 15 دنوں میں مکہ مکرمہ کی حدود میں واقع میقات مساجد میں تقریباً 20 لاکھ عمرہ زائرین کی آمد ریکارڈ کی گئی، جبکہ مملکت کے مختلف شہروں سے مکہ مکرمہ آنے والی گاڑیوں کی تعداد 2 لاکھ 91 ہزار 94 رہی۔
یہ اعداد و شمار اس بات کا واضح ثبوت ہیں کہ سعودی عرب نے عمرہ زائرین کے لیے نہ صرف وسیع انتظامات کیے ہیں بلکہ جدید سہولیات، مؤثر نگرانی اور بین الاقوامی معیار کی خدمات کے ذریعے زائرین کے تجربے کو مزید بہتر بنانے کی کوششیں بھی جاری رکھی ہیں۔