جدہ:خادم حرمین شریفین شاہ سلمان بن عبدالعزیز کی سرپرستی میں سعودی وزارتِ حج و عمرہ اور "خدمت ضیوف الرحمن پروگرام” کے اشتراک سے پانچویں حج کانفرنس و نمائش کا انعقاد 9 سے 12 نومبر 2025 تک جدہ سپر ڈوم میں کیا جائے گا۔ اس عظیم الشان عالمی اجتماع کا عنوان اس بار "مکہ سے دنیا تک” رکھا گیا ہے۔
سعودی اخبار اخبار 24 کے مطابق، گزشتہ کانفرنسوں کی شاندار کامیابیوں کے بعد اس مرتبہ بھی ایک وسیع اور متنوع پروگرام ترتیب دیا گیا ہے۔ کانفرنس میں 80 سے زائد سیشنز اور 60 ورکشاپس شامل ہوں گی جن میں دنیا بھر کے تعلیمی، تحقیقی، سفارتی اور حج امور کے ماہرین شریک ہوں گے۔ اس دوران 2400 سے زائد افراد کو خصوصی تربیت فراہم کی جائے گی تاکہ حج خدمات میں جدیدیت اور معیار کو مزید بلند کیا جا سکے۔
چوتھی حج کانفرنس کے اثرات گزشتہ حج سیزن میں نمایاں طور پر دیکھے گئے تھے۔ اُس کانفرنس میں 137 ممالک کے 220 اداروں نے شرکت کی تھی جبکہ ایک لاکھ بیس ہزار سے زیادہ افراد شریک ہوئے تھے اور 670 سے زائد معاہدوں پر دستخط کیے گئے تھے، جس کے نتیجے میں خدمات کے معیار میں نمایاں بہتری سامنے آئی۔
اس مرتبہ بھی کانفرنس کے دوران علمی و تحقیقی سرگرمیوں کے ساتھ ساتھ کنگ عبدالعزیز فاؤنڈیشن (دارۃ) ایک سائنسی و ثقافتی فورم منعقد کرے گی جس کا عنوان ہوگا تاریخ حج و حرمین شریفین۔ اس فورم میں حج کی تاریخی، ثقافتی اور تمدنی جہات پر روشنی ڈالی جائے گی اور جدید ٹیکنالوجی کے ذریعے حج کے تجربات کو ڈیجیٹل شکل میں محفوظ کرنے پر بھی غور ہوگا۔
کانفرنس کے ساتھ ایک وسیع البنیاد نمائش بھی منعقد کی جائے گی جو 52 ہزار مربع میٹر کے رقبے پر پھیلی ہوگی۔ اس نمائش میں 260 سے زائد قومی و بین الاقوامی ادارے شریک ہوں گے۔ ایک خصوصی "انویویشن زون” بھی قائم کیا جائے گا جہاں 15 نئی کمپنیوں اور نوجوان کاروباری افراد کو حج خدمات کے لیے تخلیقی حل پیش کرنے کا موقع دیا جائے گا۔ ان تخلیقی اقدامات کا مقصد حج کے دوران زائرین کو بہترین سہولتیں فراہم کرنا ہے۔
وزارتِ حج و عمرہ نے واضح کیا ہے کہ یہ کانفرنس اور نمائش حج خدمات کے میدان میں ترقی، اختراع اور عالمی شراکت داری کے قیام کے لیے ایک منفرد بین الاقوامی پلیٹ فارم فراہم کرے گی۔ وزارت نے دنیا بھر کے ماہرین، محققین اور دلچسپی رکھنے والے افراد کو دعوت دی ہے کہ وہ رجسٹریشن کے ذریعے اس بین الاقوامی ایونٹ کا حصہ بنیں۔